Ali Haydar Efendi

4.1.57.Sivastopol Şehbenderi Ali Haydar Efendi668 Ali Haydar Efendi Bükreş sefaret-i seniyyesinde müstahdem Ömer Kemal Han Efendi’nin mahdumudur. Bin iki yüz seksen bir sene-i kameriyyesi şa’banının yirmi sekizinci günü Bükreş’te tevellüt etmiştir. Evvela Bükreş’te muallim-i mahsusadan Türkçe ve Almanca tedris edip ba’de üç sene mahal-i mezkûrede kain Alman Mektebinde devam ile Alman lisanı üzerine tahsil eylemiş ve andan sonra mekteb-i sultanîsinde müretteb olan fünun-ı ikmâl ederek iki kıta şahadetname ve muahheren mekteb-i maarif-i mülkiye-i şahaneye itmam-ı tahsil ile mektepçe vasat mertebesini ihraz eylediğine mübeyyen bir kıta siyasiye şahadetnamesi ahzetmiştir. Mezkûr şahadetnamelerin suret-i musaddakaları tercüme-i hal varakasına merbuttur. Türkçe ve Fransızca ve Almanca ve Latince tekellüm ve kitabet eder. 668 BOA, HR.SAİD, No. 7, Gömlek No. 16, 5-3.

195 Bin üç yüz iki sene-i kameriyyesi zilkadesinin on dokuzuncu günü yirmi iki yaşında olduğu halde mülazemetle tahrirat-ı hariciye kalemine dâhil olmuştur. Vazife-i müteretibbesinden dolayı taht-ı muhakemeye alınmamıştır. Tahrirat-ı hariciye kâtibi saadetli Naum Efendi hazretleri tarafından işbu tercüme-i halin tahrirat-ı hariciye kalemine ait ciheti tasdik olunmuştur. Zeyl Mûmâileyh Ali Haydar Efendi bin üç yüz üç sene-i cemaziyelevvelisinin otuzuncu gününe müsâdif bin üç yüz bir sene-i maliyesi şubatının yirmi ikisinde müceddeden altı yüz guruş maaş tahsisle tahrirat-ı hariciye kalemi ikinci sınıf halifesi adedine ilhak olmuştur. Cenova başşehbenderhanesi şehbender vekili ve kançıları Ali Haydar Efendi’nin tercüme-i haline zeyldir Efendi-i mûmâileyh üç yüz altı senesi ramazan-ı şerifinin yirmi birinde (9 Mayıs 305) maaş-ı mezkûr ile tahrirat-ı hariciye kalemine avdet eylemiş ve üç yüz yedi senesi muharreminin on altısında (1 Eylül 305) altı yüz otuz altı guruş maaş ile Dersaadet liman dairesi ferman kalemi tercümanlığına tayin ve maaşı üç yüz on bir senesi şehr-i şa’ban-ı şerifinin yedisinde (1 Şubat 309) altı yüz elli guruşa bala bilağ sene-i mezbûre ramazan-ı şerifinin yirmi altısında dördüncü rütbeden mecidi nişân-ı zişânı ihsan buyrulmuş ve maaşı üç yüz on dört senesi şevval-i şerifinin dokuzunda (1 Mart 313) öşürünün tecili ile beş yüz seksen beş guruşa tedenni ve üç yüz on beş senesi şehr-i receb-i şerifinin on sekizinde (1 Kanunievvel 313) altı yüz otuz beş guruşa terakki ederek sene-i merkûme şehr-i şa’ban-ı şerifinin on dokuzuna kadar (1 Kanunisani 313) mezkûr tercümanlıkta bulunmuştur. Efendi-i mûmâilyeh sene-i mezbûre şehr-i şa’ban-ı şerifinin on ikisinde (25 Kanunievvel 313) bin beş yüz guruş maaş ve beş yüz guruş tahsisat ile Brüksel sefareti seniyyesinin taht-ı idaresinde olmak üzere müceddeden tesis olunan Cenova başşehbenderhanesi şehbender vekiliyle kançılarlığına tayin olunmuştur. Liman dairesi tercümanlığında müddet-i istihdamı ile kemmiyyet maaşatı daire-i mezkûre muhasebesinin 24 Şa’ban 315 tarihli kayd-ı suretinden ahzedilmiş. Efendi-i mûmâileyh sene-i merkûme şehr-i şevval-i şerifinin on ikisinde gümüş liyakat madalyası ihsan buyrulmuştur.