Mehmed Sadık Beliğ Bey

4.1.59.Taykan Başşehbenderi Mehmed Sadık Beliğ Bey670 Mehmed Sadık Beliğ Bey mevaliden müteveffa Hacı Ahmed Beliğ Efendi’nin mahdumudur. Bin iki yüz seksen dört sene-i hicrisyeinde (sene-i maliye 83) Dersaadet’te tevellüt ettiği tezkire-i Osmanîyye suret-i musaddakalarında muharrirdir. Fatih rüşdiye-i askeriyesinde ve muahharen mekteb-i mülkiye-i şahanenin kısm-ı idadîsinde müretteb dersleri tahsil ile şahadetname alarak bir müddet sonra ilm-i hukuk tahsil için Mısır’a ve oradan Cenevre’ye gidip edebiyat ve tarih ve felsefe ve ilm-i ruh ve menafi’ül-aza derslerine devam ile hukuk şubesinden şahadetname aldığı Arabi ve Fransızca bildiği tercüme-i hal varakasında muharrirdir. Mekteb-i mülkiye-i şahanenin idadî kısmının bin sekiz yüz seksen dokuz ve Cenevre hukuk mektebinden bin sekiz yüz doksan beş tarihli şahadetnameleri almıştır. Re’sen şeref-sânih olan irade-i seniyye-i hazret-i hilâfetpenâhi mûcibince bin üç yüz on altı senesi şa’ban-ı şerifinin beşinde (7 Kanunievvel 314) iki bin guruş maaşla bâb-ı âli istişare odası muavinliğine tayin kılınmıştır. İstişare odasından yazılan mülahazada tercüme-i hal varakasının istişare odasına müte’allik mündericatı tasdik kılınmıştır. Zikrolunan muavinlik tarihi tayiniyle miktar-ı maaşı komisyona tebliğ buyrulan irade-i seniyye-i cenab-ı padişahî kaydının ve tarih ve mahal-i veladeti tezkire-i Osmanîyye suret-i musaddakasından anlaşılıp suret-i merkûme ile zikrolunan şahadetname suret-i musaddakası tercime-i hal varakasıyla beraber hıfzedilmiştir.