Abdülkerim Paşa

Sipâhi Pazarı kethüdası Said Ağa'nın mahdûmudur. Bin iki yüz elli beş tarihinde Bursa'da tevellüd eylemişdir. Bursa Mekteb-i İ'dâdî-yi Askerisi'nde tahsilde bulundukdan sonra Mekteb-i Harbiye Şâhâne'ye dâhil olmuş ve ikmâl-i tahsîl ile süvâri mülâzım-ı sâniliği rütbesi ihsân buyurulmuş ve seksen bir tarihinde mülâzım-ı evvellik rütbesiyle ikinci ordu müşîrliği yâverliğine ta'yîn olunmuş ve bir sene sonra süvâri yüzbaşılığı ve sonra tedrîcen sol ve sağ kolağalık rütbelerine nâil olarak makâm-ı seraskeri yâverliğinde dahi bulunmuşdur. Seksen altı tarihinde Yemen'e sevk olunan fırka-i askeriye ile Yemen'e azîmet eylemiş ve muahharan Dersaadet'e avdetinde binbaşılık rütbesi ihsân buyurulmuş ve makam-ı sadâret yâverliğine tahvîl-i me'mûriyet etmişdir. Rütbesi kaymakamlığa terfi' ve sonra beşinci ordu-yı humâyûn süvâri üçüncü alayı miralâylığıyla Şam' a azîmet ve oradan ikinci ordu-yı humâyûna tahvîl-i me'mûriyet eylemiş ve o sırada zuhûr eden Sırbiye Mes'elesinde Vidin'e me'mûr olmuş ve ibrâz eylediği hüsn-i hizmete mukâfaten süvâri mirlivâlığı tevcîh buyurulmuşdur. Rusyalularla vukua gelen muhârebe-i zâilede Şumnu'da mütehaşşid süvâri fırkası kumandanlığına ta'yîn olunmuş ve o sırada üçüncü rütbe Mecidî nişânı ihsân buyurulmuşdur. Sonra fırka-i müstakîle kumandanlığıyla Osman Pazarı fırkasına nakl-i me'mûriyet etmiş ve bulunduğu muhârebelerde hizmet ve muvaffakiyeti meşhûd olmasıyla ferîklik rütbesi tevcîh olunmuşdur. Muahharan ba-emri âli Çatalca'ya avdet ve taburların fırka ve livâlara taksiminde birinci kolu teşkîl eden birinci fırka kumandanlığıyla Boğazköy'e azîmet idub Berlin Muâhedesi'nin hitâmına kadar oraların muhâfazasında bulunmuşdur. Hitâm-ı muâhedede tertîb olunan bir kolordu kumandasıyla Çatalca hatt-ı istihkamâtının inşâsına me'mûr olmuş ve sonra Anadolu Dîvân-ı Harbi âzâlığına nakl ile bir müddet devam ettikden sonra Edirne'deki seyyâr kolordusu kumandanlığıyla vâli muâvinliğine ta'yîn olunmuş ve muahharan Bâb-ı Seraskerice icrâ edilen tensîkatda Levâzım Dâiresinin dördüncü şu'besi müdîrliğine tahvîl-i me'mûriyet etmiş ve bi'l-isti'fâ beşinci ordu-yı humâyûna mensûb redif-i mukaddem yirmi üçüncü fırka kumandanlığına ta'yîn olunmuş ve bir müddet sonra teftiş me'mûriyetiyle Yemen'e azîmet idub Dersaadet'e avdetinde ikinci rütbe Mecidî nişân-ı zî-şânıyla taltîf buyurulmuşdur. Beşinci ordudaki me'mûriyetine avdetle îfâ-yı

me'mûriyet eylemekde iken Yunan gâilesinde Katerin'de mütehaşşid altıncı fırka-i askeriye kumandanlığına ta'yîn ve sonra Üsküb'de mütehaşşid fırkalardan ihtiyât fırkası kumandanlığına tahvîl-i me'mûriyet etmiş ve üç yüz iki tarihinde Selânik, Kosova ve havâlisi umûm kumandanlığı vekâletine ta'yîn ve ikinci rütbe-i Osmanî nişân-ı âlisi ihsân buyurulmuşdur. On bir mah vekâlet-i mezkûrede kaldıkdan sonra beşinci ordudaki me'm-riyetine iade olunmuş ve muahharan ordu-yı mezkurun süvari fırkası kumandanlığına nakl-i me'mûriyet etmişdir ve Girid'e ta'yîn olunmuş ve hüsn-i hizmetine mukâfatan birinci rütbe Mecidî nişân-ı zî-şânı ve Girid gâile-i âhiresinde Kandiye mutasarrıflığıyla fırka-i askeriye kumandanlığına ta'yîn olunmuş ve hüsn-i hizmetine mükâfatan birinci rütbe Mecidî nişân-ı zî-şânı ve bir kıt'a Girid altun madalyası ihsân buyurulmuşdur. Üç yüz sekiz tarihinde asâkir-i şâhâne ile Trablusgarb'a gönderilmiş ve üç ay sonra Dersaadet'e avdetle taht-ı riyâset-i hazret-i padişâhîde bulunan Teftiş-i Askeri Komisyonu Âlisine me'mûr olmuş ve bin üç yüz dokuz senesinde fırka-i askeriye kumandanlığı inzimâmıyla İşkodra vilâyeti vâliliğine ta'yîn ve İşkodra havâlisinde kan güdülmesi âdet-ı seyyiesinin ref' ve izâlesinde hizmet ve muvaffakiyeti mûcib-i takdîr-i âli olmağla fahrî yâverlik ünvânı ihsân buyurulmuşdur.

Karadağ Hükûmeti'nin birinci rütbe Danilo nişânını hâmildir.