Süleyman Fâik Efendi

Süleyman Fâik Efendi Sûfî Osman Efendi'nin oğludur. 1286 senesi şehr-i Receb-i şerîf gurresinde 25 Eylül 1285 (7 Ekim 1869) Karahisar-ı Sâhib kasabasında tevellüd eylediği nüfûs-ı tezkire-i Osmâniyesi sûret-i musaddakasında muharrerdir. Kasaba-i mezkûre Sıbyân Mektebinde mebâdi-i ulûm-ı dîniyyeyi ve Câmi-i Kebîr medresesinde Emsile ve Binâ ve Maksûd ve İzzî ve Avâmil ve Izhâr ve Molla Câmi'nin nısfına kadar okuduktan sonra Dersaâdet'de Dâru't-Tedrîs Mektebinde altı sene müretteb fünûnu tahsîl ile a'lâ derecede şehâdetnâme ve ilm-i ferâizden icâzetnâme almış ve elyevm Matbaa-i Âmire musahhihi ve Sultan Bâyezid-i Veli Hân Hazretleri Câmi-i Şerîfi Dersiâmlarından Osman Efendi'nin halka-i tedrisine devâm ederek akâid okumakda bulunmuşdur. Türkçe okur-yazar. 1310 (1892) sene-i mâliyesinde yirmi dört yaşında iken Bâb-ı Seraskerî Hâssa Erkân-ı Harbiyye Yedinci Şu'besi komisyonu mahsûs huzurunda bil-imtihân ikinci derecede tabur kâtibi muâvinliği meslekinde istihdâmı için isbât-ı ehliyet etmiş ise de ba'zı esbâb-ı meşrû'adan dolayı teklif olunan (?) ordularına gitmemiş ve 1314 senesi Muharremü'l-Merâmı gurresinde 31 Mayıs 1312 (12 Haziran 1896) Şehremânet-i Celîlesi Kordon Evkâf Muhâsebesi Kalemine mülâzemetle dehâlet idüb îfâ-yı hizmet eylemekde bulunmuşdur. Kordon Evkâf-ı Muhâsebeciliğinden tercüme-i hâl varakasının mûmâileyh Süleyman Fâik Efendi'nin hatt-ı destiyle yazıldığı ve afîf ve müstakîmü'l-

etvâr olduğu tasdîk olunmuşdur. Dâru’t-Tedrîs’den aldığı 9 Rebiyü’l-Evvel 1313 (30 Ağustos 1895) ve 19 Ağustos 1311 (31 Ağustos 1895) tarihli şehâdetnâmenin 9 Rebiyü’l- Evvel 1313 (30 Ağustos 1895) tarihli Arabiyyü’l-ibâre icâzetnâme ile nüfûs tezkire-i Osmâniyesi’nin sûret-i musaddakası ve tabur kâtibi muâvinliğinde isbât-ı ehliyet eylediğine ve ma‘zeret-i meşrûasına mebnî teklîf olunan (?) orduları tabur kâtibi muâvinliğini kabûl eylemediğine dâir hâssa ordû-yı hümâyunu müşiriyet-i celîlesinden gelen 5 Şubat 1313 (17 Şubat 1898) tarihli ve üç bin yedi yüz doksan dört numaralı tezkire-i cevâbiyye tercüme-i hâl varakasıyla evkâf-ı hümâyun nezâret-i sicil-i ahvâl şûbesinde mahfûzdur. 20 Safer 1317 (30 Haziran 1899)/ 16 Haziran 1315 (28 Haziran 1899).

Mûmâileyhin 1316 senesi Ramazan’ının 5’inde (17 Ocak 1899) 5 Kanun-ı Sâni 1314 (17 Ocak 1899) ikiyüzkuruşmaaşla Kordon Evkâf Kalemi ikinci kitâbetine ta’yîn ile maaşı 1320 (1902) senesi Rebiyü’l-Evvel’inin 5’inde (12 Haziran) 19 Mayıs 1319 (1 Haziran 1903) ikiyüzellikuruşa iblâğ edildiği Evkâf-ı Hümayun Sicil Şubesinin vukûât pusulalarında gösterilmişdir. Mûmâileyh vezâif-i me’mûriyetini hüsn-i îfâda şâhid olan ikdâm ve gayretine mebnî şayân-ı taltîf-i âlî olduğuna binâen sene-i merkûme Cemzâiyelûlânın on sekizinde rütbe-i sâlise tevcîh olunmuşdur.

Mûmâileyh Fâtih Câmi-i Şerîfi müderrislerinden Zeynelâbidin Efendi’den ikmâl-i tahsîl iderek icâzetnâme almasından nâşi 1322 senesi Zilkade’sinin 29’unda (4 Şubat 1905) gümüş liyâkat madalyası ihsan buyrulduğu ol bâbdaki berât-ı âlişân ile icâzetnâme sûret-i musaddakalarından anlaşıldığı şu’be-i merkûmenin vukû‘ât pusulasında gösterilmişdir.

Mûmâileyhin müddet-i tahsîliyyesi bir seneden ibâret olmak üzere dâire-i nezârette küşâd edilen mekteb-i evkâfın ilk sene-i tedrîsiyesini ikmâl ile 1330 senesi Cemâziyelûlâsının 17’sinde (3 Haziran 1912) 13 Nisan 1328 (26 Nisan 1912) a’lâ dereceden şehâdetnâme ahz eylediği 17 Haziran 1328 (30 Haziran 1912) tarihli vuûât pusulasıyla bildirilmişdir.