Osman Paşa

Miralây müteveffâ Ahmed Şükri Bey'in mahdûmu olub bin iki yüz elli altı sene-i hicriyyesinde Dersaâdet'de tevellüd etmişdir.

Mekteb-i Harbiye-i Şâhânede ulûm ve fünûn-ı askeriyyeyi tahsîl ederek bin iki yüz yetmiş sekiz senesinde Erkân-ı Hârbiye mülâzımlığı tevcîh buyurulmuş ve bir sene sonra bâ-şehâdetnâme yüzbaşılık rütbesine nâil olmuşdur.

Sene-i merkumede Şumnu'ya azîmetle mevâkî ve emâkin-i askeriyenin haritalarını almak me'mûriyyetini îfâ eyledikden sonra Dersaâdet Ebniye-i Askeriye İnşâat Komisyonu'na me'mûr olmuş ve bin iki yüz seksen bir senesinde kolağalık rütbesine nâil olub Çırağan sâhilsaray-ı hümâyûnunun inşâsında mühendislik vazîfesinde dahî bulunmuşdur. Bin iki yüz seksen altı senesinde ikinci Ordu-yu Humâyûn Erkân-ı Harbiyesi'ne me'mûr olmuş ve bin iki yüz seksen sekiz senesinde Erkân-ı Harbiye binbaşılığına nasb buyurulmuşdur. Bir sene sonra Mudanya ve Bursa şimendüfer komisyonuna me'mûr ve bin iki yüz doksan tarihinde Şumnu²⁴ istihkâmat komisyonuna âzâ ta'yîn olunmuş ve olvakit Memleketeyn askerinin sonbahar manevralarında taraf-ı Devlet-i Aliyye'den me'mûren hazır bulunmuşdur. 1291 senesinde Hersek mes'elesinin vukuuna mebnî Sırbistan üzerine icrâ-yı harekât-ı askeriye olunmak üzere Ordu-yu Hümâyûnun Erkân-ı Harbiye riyâsetiyle Vidin'e azîmete me'mûr olmuş ve orada îfâ-yı vazîfe-i askeriye etdikten sonra bin iki yüz doksan iki senesinde kaymakamlık rütbesine nâil olmuş ve Sırbistan'da Zayçar²⁵ cihetinde vuku' bulan bil-cümle muhârebede hazır bulunmuşlardır. İbrâz etdikleri şecâat ve hüsn-i hizmete mükâfatan bin iki yüz doksan üç senesinde beşinci rütbeden bir kıt'a Mecidî nişân-ı zî-şânı ihsân buyurulmuşdur.

Rusya muhârebesinin hitâmında kumandasında bulundukları bir livâ piyâde askeriyle def'u tenkîl-i eşkıyâ' zımnında Girid'e azîmetle îfâ-yı me'mûriyyet ettikden sonra tensîkât-ı cedîde-i askeriyede Hassa Ordu-yı Humâyûnu birinci alayı miralâylığına nakl olunmuş ve bin iki yüz doksan altı senesinde Veli Rıza Paşa ile beraber İşkodra'ya azîmet me'mûr oldukları olgün mes'elesinin teskînine muvâffak olarak Dersâdet'e avdetle bin iki yüz doksan sekiz senesinde Gümülcine redîf mirlivalığına ve sene-i merkumede feriklik rütbesi tevcihiyle Mekke-i Mükerreme ve Medine-i Münevvere'de bulunan Asâkir-i Şâhâne kumandanlığına ve bin iki yüz doksan dokuz senesinde kumandanlık-ı mezkûrun inzimâmıyla Hicâz Vilâyeti vâliliğine ta'yîn ve bin üç yüz bir senesinde gümüş imtiyâz madalyası ve bin üç yüz iki senesinde birinci rütbe Mecidî nişân-ı zî-şânı ihsan ve bin üç yüz üç senesinde rütbe-i sâmiye-i müşîri tevcîh ve muahharan altun imtiyâz madalyası dahi inâyet buyurulmuşdur.

27 Çocukluğunda sıbyan mekteplerinde okutulan dersleri görmüştür. Türkçe ve Arapça konuşur ve yazar.